Dofrablogg

HM 2010: Fjórða og síðasta færsla

 Fyrir úrslitaleikinn lýstu Schneider og séstaklega Robben yfir að aðalatriðið væri að vinna. Það skipti ekki máli hvort þeir spiluðu flottan eða fúlan bolta bara ef þeir ynnu leikinn. Fyrir leikinn sagði ég við Binna, sem kom um kl 2300 til að horfa á leikinn með mér, að Webb hinn breski spjaldaði mikið og hleypti oft upp leikjum í seinni hálfleik með misræmi í dómum. Yfirlýsingar Hollendinganna og þessir eiginleikar Webbs gáfu ekki góð fyrirheit um leikinn.

 Það átti líka eftir að koma í ljós að tuddaskapurinn sem Holland sýndi í leikjunum gegn Brazilíu og Úrugúæ var mikilvægur þáttur í leik þeirra gegn Spáni. Og það þýðir ekkert að segja að Spánn hafi líka fengið mörg spjöld (5 á móti 10). Tónninn var settur með tuddaskap Hollands og brot Spánar voru flest lítilvæg. Hitt er svo annað mál að dómurum hættir til að reyna að hafa jafnræði í spjöldunum og virðast halda að það sé merki um ómdeilanlegt hlutleysi.

Og Webb lét ekki sitt eftir liggja. Hann notaði 15 gul spjöld (sumstaðar er sagt 13 eða 14) og eitt rautt og meira en tvöfaldaði fyrra met í úrslitaleik (6 í Brazilíu 1978). Auk þess þorði hann ekki þegar á reyndi. De Jong ásamt van Bommel hefðu átt að fara í sturtu strax í fyrri hálfleik. Eftir því sem leið á leikinn fjölgaði afglöpunum og misræmið í dómum varð meira og meira sláandi. Einn fékk spjald fyrir að sparka burt bolta eftir að Webb stöðvaði leikinn en annar slapp með sama brot nokkrum mínútum síðar líklega vegna þess að hann var með gult spjald fyrir.

 Eftir mótið stendur tvennt uppúr í mínum huga:

• Spánn spilaði frábæran tæknibolta en skoraði allt of fá mörk. Ég var orðinn hundleiður á þessu bróderíi. Fótbolti gengur útá að skora mörk eða amk að skjóta á markið. Stundum fannst mér að Spánverjarnir hefði gleymt þessu.
• Þýskaland átti skemmtilegasta liðið. Þeir spiluðu vel skipulagðan sóknarbolta og voru tæknilega í fremstu línu. Allir leikir þeirra voru skemmtilegir nema etv leikurinn gegn Spáni. Þeir voru svo yfirvegaðir á boltanum að mér fannst gullna reglan "vertu snöggur en ekki flýta þér" eiga best við þá.

Þetta er búinn að vera góður mánuður. Ég hef átt frábærar stundir með boltanum. Ég er svo lánsamur að geta horft á útsendingar frá BBC og ITV en þeir skiptu keppninni milli sín á enska markaðnum. Þar voru gæði útsendingarinnar miklu betri en hjá RÚV og þulirnir og umfjöllun almennt í hæsta gæðaflokki. Ég tók nánast alla leikina upp og horfði á þá á besta tíma kvöldin og horfði sjaldan á meira en einn leik á dag. Stundum varð ég að loka fyrir útvarp nánast allan daginn og byrja hvert símtal með viðvörun um að ég vildi ekki heyra úrslit.

Næst er það Evrópumótið, - í Svíþjóð held ég.

[Uppfært 15.7.2010: EM verður haldið í Póllandi og Ukraníu]

HM 2010: þriðja færsla

 Ég horfði á 2 leiki í 8-liða úrslitum. Í öðrum sigraði verra liðið (Holland) og í hinum það betra (Þýskaland).

Það var ekki fyrr en einn Brassanna var rekinn útaf að það skapaðist smá jafnræði með liðunum í leiknum við Hollendinga því þeir voru lélegri allann tímann fram að því. Hitt er svo annað mál að Brassarnir áttu a vera búnir að gera út um leikinn áður en það gerðist.

Það má segja að markvörður þeirra, Julio Cesar, hafi verið besti maður liðsins, - fyrir Hollendingana. Fyrst náði hann ekki að verja ca 40 m langt skot og síðan kýldi hann framhjá auðveldum bolta sem lenti beint í netinu. Reyndar var ekki við góðu að búast af manni sem mætir til leiks í buxum eins og hann gerði. Þær voru svo ljótar og öll hollingin á honum að það er búið að censora allar myndir þar sem búningurinn sést sæmilega. Amk fann ég bara þessa mynd sem hér fylgir sem samt er mörgum flokkum betri en í leiknum geng Brössunum.

Hinn leikinn (Þýskaland-Argentína) var hrein unun á að horfa. Sumir hafa talað um að vörnin væri veiki punktur argentínska liðsins en að það gerði ekkert til því þeir væru svo flinkir að skora mörk. Ég er nú ekkert endilega sammála fyrra atriðinu en þetta var ein af þessum staðal klisíum sem gengu meðal fréttamanna og fótboltaspekinga.

 Þessir sömu aðilar töluðu líka um að þýska liðið væri nokkuð ungt til að ná góðum árangri á þessu móti og að auk þess vantaði Ballak. Hvorutveggja hefur auðvitað reynst tóm þvæla. Reyndar hafa spekingarnir sem sitja með Gary Lineker í BBC-stúdíóinu spáð rangt til um úrslit allra leikja og væntanlega framvindu þeirra og markaskor (nánari rannsóknar er þörf). En það er allt í lagi og gerir þetta bara skemmtilegra.

Nú er líka talað um að niðurstaðan í leiknum veiti Enskum uppreisn æru þar sem þeir hafi amk skorað mark hjá Þjóðverjunum (reyndar tvö). Hvernig sem því er háttað stend ég við þá skoðun mína að Englendingar séu lélegir í fótbolta.

Sennilega er fjarvera Ballaks og tiltölulega ungur aldur þýska liðsins einmitt sterkast þátturinn í því hversu frábært þetta lið er. Ballaki hættir til að hægja á leiknum og er hvergi nærri eins beinskeyttur og þessir strákar. Auk þess vill hann vera foringi og að allir lúti hans vilja sem er ekki endilega vilji þjálfarans eða það sem er best fyrir líðið í heild. Slíkt kann ekki góðri lukku að stýra.

Eftir þennan leik og önnur úrslit í 8-liða úrslitum verð ég auðvitað að spá Þýskalandi heimsmeistaratitlinum. Ég get ekki séð að Spánn eigi séns á móti þeim en Spánn var ásamt Þýskalandi, Argentínu og Brasilíu eitt þeirra liða sem mér fannst eiga möguleika á sigri. Og hvorki Holland né Uruguæ eru líkleg til að sigra þá.

HM 2010: önnur færsla

 Englendingar fengu heldur betur skell á þessu móti. Jafntefli í þokkalegum baráttuleik gegn BNA, sem þeir voru óheppnir að vinna ekki, jafntefli í lélegum leik gegn Alsír og 1-0 sigur í lélegum leik gegn arfaslökum Slóvenum. Þetta gaf þeim annað sætið í riðlinum á eftir BNA. Á eftir BNA. Þeir báru sig bara nokkuð vel, töldu sig hafa spilað frábærlega gegn Slóveníu og voru hvergi bangnir að mæta Þjóðverjum í fyrsta leik sínum í 16 liða úrslitum.

Og Þjóðverjar niðurlægðu þá með 4-1 sigri. Munurinn á liðunum var svo mikill og augljós að meira að segja enska pressan féll ekki í þá gryfju að kenna utanaðkomandi aðstæðum um ósigurinn. Hún kenndi ekki einusinni markinu sem dæmt var af Englendingum um ósigurinn. Staðreyndin er sú að þótt enska Premier deildin sé bæði öflug og skemmtileg þá eru Englendingar slakir í fótbolta. Það eru erlendar stórstjörnur sem gera deildina það sem hún er.

Enski boltinn lifir enn á fornri frægð og svo því að fótbolti er uppruninn í Englandi. En England hefur ekki komist á HM í 3 af síðustu 9 skiptum (36 ár) og aðeins unnið einu sinni á umdeildu marki á heimavelli 1966. Þýskaland og Ítali hafa verið með í öll 9 skiptin, Spánn í 8 skipti og meira að segja Svíþjóð hefur verið jafnoft með og England.

Enska pressan fjallar þó mikið um að nú þurfi að tæknivæða dómgæsluna í boltanum eftir tvenn hrikaleg dómaramistök og mörg smærri sem örugglega hafa haft áhrif á einhver úrslit. Mín skoðun er sú að það beri að fara varlega í því.

• Í fyrsta lagi er ófrávíkjanlegt að sömu reglur gildi allsstaðar og að umgjörðin sé þannig að nánast allir geti haldið viðurkennd mót. Ég sé t.d. fyrir mér að hér heima myndi það valda ómældum erfiðleikum ef nota þarf flókinn og dýran tæknibúnað við leiki á Íslandsmóti og í Evrópukeppni.

• Dómgæsla þar sem mikið er stuðst við tæknibúnað hefur tilhneigingu til að hægja á leikjum. Fáir gera sér grein fyrir því að í síðasta Superbowl leiknum í BNA, sem tók um 3 tíma, var boltinn í leik í 11 mínútur. Ellefu mínútur í 360 mínútna leik. Á HM sér maður jafnvel votta fyrir því að leikmenn séu að gjóa augunum á sýningarskjáina á vellinum til að sjá hvernig þeir koma út.

En í dag er það Holland - Brasilía og til gamans má geta þess að Holland hefur verið með á HM í 6 skipti af síðustu 9 en Brasilía auðvitað í öll 18 skiptin sem HM hefur verið haldið. Á morgun er það svo Þýskaland - Argentína, en þessir tveir leikir geta vel verið hinir eiginlegu úrslitaleikir mótsins.

HM 2010: fyrsta færsla

 Þegar þetta er skrifað hefur heil umferð verið spiluð í Suður Afríku og reyndar 7 leikjum betur.

Nokkur lið hafa valdið mér vonbrigðum

SPÁNN olli mér vonbrigðum þegar þeir spiluðu gegn frábærum varnarleik Sviss í fyrri hálfleik og leikmenn Sviss höfðu lítinn áhuga á að hætta sér fram fyrir miðju. Það var nokkuð ljóst að Spánverjarnir myndu leggja upp nýtt leikplan í hálfleik. Það sem ekki var innifalið í nýja leikplaninu var að Svissararnir ætluðu aldrei að leika síðari hálfleikinn eins og þann fyrri. Þeir sendu nýtt lið á völlinn sem spilaði bara nokkuð beittan sóknarbolta. Spánverjar vissu ekki sitt rjúkandi ráð og reyndist erfitt að laga sig að nýja liðinu og töpuðu að lokum 0-1. Hitzfeld klókur.

Þó Þýskaland ynni leik sinn gegn arfaslöku Áströlum þá fannst mér liðið ekki sannfærandi en kóaði dálítið með öllum hinum sem fannst þeir frábærir. Í gær kom í ljós að þótt ýmislegt búi í þessu liði þá virðast þeir vera áhugalitlir og ekki almennilega mættir á staðinn.

Mér finnst England aldrei sýna neitt sérstakan bolta. Þeir komust þokkalega frá miklum baráttuleik við BNA en klikkuðu algjörlega í gær.

Þangað til í gær lifði ég í voninni um að Frakkland sýni eitthvað af gömlu töktunum sínum. Það varð ekki. Þeir voru bara leiðinlegir.

Tvö lið hafa staðið undir væntingum mínum

Argentína og Brasilía sem þurfti að brjótast í gegnum 10 manna vörn N-Kóreu.

Ég hafði engar sérstakar væntingar um Mexico sem spilaði þokkalega í opnunarleiknum og bráðvel í leiknum gegn Frakklandi.

Mótið fór hægt af stað og flestir leikirninr voru leiðinlegir framanaf. Þetta hefur nú breyst og leikirnir í annarri umferð hafa flestir verið bráð skemmtilegir þó þeir hafi ekki allir verið vel leiknir. Ég hef reyndar ekki séð alla leikina, - til að haf það á hreinu.

Fallnir í aðra deild

Ég verð víst að viðurkenna að fótbolti er miklu skemmtilegri ef von er til þess að liðið manns nái góðum árangri. Það er þá að einhverju að keppa. Þannig hefur þetta ekki verið með liðið mitt undanfarin ár. Síðasti pistillinn minn um Newcastle United var skrifaður í jan 2008 og síðan þá höfum við haft 5 þjálfara ef ég tel Big Sam með.

Newcastle United er fallið í aðra deild og átti það fyllilega skilið. Undanfarnir 3 leikir gátu allir valdið úrslitum um það hvort við féllum en við megnuðum ekki að nýta okkur það. Til marks um dugleysi okkar og til að kóróna lánleysið þá féllum við á markinu sem við skoruðum í eigið mark í síðasta leik tímabilsins.

Núverandi eigandi Newcastle United er Mike Ashley, nýríkur bísnismaður sem sver sig í ætt við Jón Ásgeir o.fl. útrásarvíkinga. Hann varð ríkur á því að kaupa vörumerki og reka sportvöruverslanir, er á svipuðum aldri og græðgisgæarnir okkar og á svipuðum slóðum á listum yfir ríka menn í Englandi. Og eins og suma þeirra dreymdi hann um að eignast fótboltalið. Það var svo hip.

 Hann keypti liðið fyrir tveimur árum og síðan hafa 6 stjórar komið við sögu, fótboltaforstjóri og tugir ráðgjafa um stjórnun og fótbolta sem töldu sig nú aldeilis vita allt um rekstur á fótboltaliði. Mestum hluta þjálfara, nuddara, sjúkraþjálfa, sálfræðinga, búningaþvottakonum og drykkjarvörudrengja hefur líka verið skipt út a.m.k. einu sinni. Og árangurinn er þessi.

Er þetta nokkuð kunnuglegt mynstur? Höfum við nokkuð horft uppá einhverja snillinga fljúga hátt og setja svo allt á hausinn?

Wii Fit líkamsræktartækið

Ég hef alltaf talið mig vera frekar raunsæjan og skynsamann mann. Uppá síðkastið hef ég líka fengið talsvert út úr því að láta bera á því að ég hafi lært eitthvað með árunum. Að ég hafi reynslu og taki mark á henni. Þetta á t.d. við um mataræði og líkamsrækt. Ég veit allt sem ég þarf að vita um prótein, kolvetni, um mettaða og ómettaða fitu og um transfitu, um HDL og LDL, BMI, og PSA, um kalóríur, BMR ofl. ofl. Ég veit líka sitthvað um eróbik, styrktaræfingar, teyjuæfingar og bicep og tricep.

Vandamálið hefur alltaf verið að nota þessa vitneskju á árangursríkan hátt til að halda bæði þyngd og líkamlegu atgjörvi í góðu horfi. Nú hefur þetta breyst á einni svipstundu. Ég rakst á frábært undratæki á netinu sem á eftir að gera mig bæði grannan og stæltan. Og ég er kominn lengra því ég er nú þegar búinn að ákveða hvar ég ætla að staðsetja tækið í íbúðinni hjá mér og hef tryggt mér einkaumboð til að selja tækið í allri Austur Evrópu.

Sumir eru alltaf að setja sér óraunhæf markmið og renna svo á rassinn með allt. Þetta er ekki þannig og ég get varla beðið með að byrja að gera æfingar. Og fyrsta æfingin, þessi með að halla sér á hliðarnar til skiptis, sýnist mér vera alveg mögnuð. Horfið á myndbandið og leggið inn pöntun. Ekki gleyma því að það mun fljótt reynast nauðsynlegt að hafa fleiri en eitt tæki á heimilinu ef heimilismenn eru fleiri en einn. Þetta er einmitt alveg stórfínt fjölskyldusport.

Nú er gaman í Newcastle

Big Sam, fyrrv. þjálfarinn hans Guðna Bergs, er hættur og leit stendur sem hæst að nýjum þjálfara. Að mörgu leyti tók Sam upp ný vinnubrögð hjá Newcastle. Það sem hann hefur ekki náð að sanna hjá Newcastle, er að hann kunni að spila fótbolta. Innkaupin hans, liðsuppstillingar og leiktaktik benda eindregið til þess að hann kunni það ekki. Ég hef tekið þátt í umræðunni á netinu, t.d. með eftirfarandi:

16. des. 2007
After Sam produced some ProZone statistics I went through the trouble of counting the long balls (í leik á móti Fulham). 19 in the first half and 18 in the second, total 37. After 7 of those we kept possession although we lost possession rather quickly in some cases. After 30 long passes we did not get possession of the ball...

4. jan. 2008
As coincidences go this one is telling: On this day in 2006 under Souness we had 26 points. On this day in 2007 under Roeder we had 26 points. Both managers were sacked, Souness in feb 2006, Roeder in may 2007. ...

Þetta er ekki ný staða fyrir Newcastle því við höfum haft 6 þjálfara á 10 árum. En samt er allt öðruvísi núna vegna þess að nýir menn eru við stjórnvölinn hjá Newcastle United. Nýr eigandi, ný stjórn, nýr framkvæmdastjóri og félagið er ekki lengur skrásett í kauphöllinni. Sem sagt, eigandinn þarf ekki að taka nótís af neinum nema sér sjálfum og stuðningsmönnum.

Nú verður verulega spennandi að sjá hver kemur til félagsins og hvernig hann tekur á málum. Maður verður að reikna með 2-3 árum þangað til við náum árangri, t.d. með því að komast í Evrópukeppni og keppa við hina 4 stóru. En við gerum kröfu um að sjá breytinar strax frá því sem Sam var að gera.

Allir mæna nú til Alans Shearers um að hann taki við þjálfarastarfinu. SPENNANDI.

Orð dagsins:

Ég er bjartsýnismaður. En ég er bjartsýnismaður sem tekur regnfrakkann sinn með. 

(Harold Wilson)

Big Sam á leiðinni

  Á meðan við Kári ræddum okkar á milli um það á sunnudaginn var að nú væru dagar Glenns Roeder hjá Newcastle taldir, þá sat Roeder sjálfur við að skrifa uppsagnarbréfið. Saga Newcastle í þjálfaramálum er broguð, - svo ekki sé meira sagt. Eftir Kevin Keegan hafa þeir allir verið lausráðnir. Sir Bobby var auðvitað langflottastur, en Souness lang sístur. Það var þó Souness sem naut mests trausts hjá Shepherd og stjórn félagsins. Hann fékk aldrei almennilegan stuðning stuðningsmannanna, en Shepherd afhenti honum 50 millj, punda. Sir Bobby fékk ekkert álíka og enn síður Glenn kallinn.

Eitt er þó til bóta hjá Shepherd núna. Í stað þess að reka þjálfara á miðju tímabili, án þess að hafa hugmynd um hver gæti tekið við, þá er nú sumarið framundan og nýr þjálfari í sigtinu. Við skulum a.m.k. vona að atburðarásin í kringum Big Sam Allardyce sé hönnuð með það að markmiði, að hann taki við. Að vísu sagðist hann ætla að setjast í helgan stein eftir að samningstímabilinu lyki, þegar hann undirritaði 10 ára samning við Bolton árið 1999. En allt bendir þó til þess að hann taki við. Hann mun þá ekki fá neitt viðlíka summu til innkaupa og Souness fékk.

Engin efast um hæfni Big Sam. Og Guðni Bergs bar honum afbragðsgott orð. Hann er algjör tækni gúrú og notar sálfræðinga, óhefðbundnar lækningar og austurlandavísindi til að mótívera leikmenn og búa þá sem allra best fyrir hvern leik. Maður hefur haft á tilfinningunni að það sé eitthvað að þjálfunaraðferðum í Newcastle, sem veldur ofurtíðni meiðsla. Souness kenndi æfingarvellinum um og Glenn kom með nýtt staff að hluta, en eftir sem áður héldu meiðslin áfram sem aldrei fyrr. Ef Big Sam kemur til verka, munu allar aðferðir breytast og vonandi þýðir það endalok ofurmeiðsla.

Að sjálfsögðu fara í gang sögur um alla þá þjálfara sem hafa áhuga á jobbinu. Ég vona bara að sögurnar af Sven Göran eigi ekki við rök að styðjast. Og þótt Toonherinn hafi blendnar tilfinningar í garð Big Sam, þá hlakka ég til að fá hann. Mig er farið að dauðlanga í stabílitet.

 

Orð dagsins:

"If you're not a born-again Christian, you're a failure as a human being."

(Jerry Falwell)

Newcastle-Portsm.

Slæmu fréttirnar: 

Zog, Parker og Milner eru komnir á sjúkraskránna með öllum hinum og Dyer fékk svöðusár á lærið. Zog, Duff, Milner og Emre hanga of mikið á boltanum og afspilinu oft ábótavant. Emre tekur skotið í stað þess að gefa á dauðafrían og eldheitan Obafemi. Oba hittir ekki nægjanlega vel markið, sem er ókostur fyrir sóknarmann. Hmmm!

Og svo góðu fréttirnar:   

1. Dyer gefur liðinu alveg nýja vídd. Hann er sá eini sem hefur auga fyrir og virkjar "auða rýmið." Hann hangir á boltanum, en öfugt við hina, þá skapar hann með því autt rými og notar það.
2. Hin alræmda vörn er að gera það gott. Oft er skelfilegt að horfa á, en þeir hafa snarbatnað og engin stórkostleg glappaskot. Enda komnir með þjálfara með víkingablóð, ef mark má taka á nafninu (Nigel Pearson = Nikulás Pétursson).
3. Solano tekur möglulaust að sér hægri bak og skilar því með sóma.
4. Og Sibierski. Ókeypis öldungurinn, sem ekki var nothæfur hjá Mancity. Honum fer fram með hverjum leik. Ég held bara að hann sé fljótari að hlaupa núna en í haust. Í okkar meiðslamálum hefur hann verið ómissandi og óborganlegur. Satt að segja leist mér nú ekkert sérlega vel á hann, hélt hans hlutverk væri bara að fylla uppí tölu leikmann á vellinum. En aldeilis ekki.

Góðir tímar framundan. Ég á eftir að sjá nýja 007, ég fer á tónleika á sunnudagskvöldið kl 24:00, Mozart Requiem og ég fer til Rómar 7. des. n.k. Fjögurra nátta ferð. Hey jibbí jei.

 

Myndavélin lofar góðu. Zoomið er
frábært. Báðar myndirnar eru teknar fríhendis.

 

Við erum neðstir

..... ásamt með tveim öðrum liðum. Við höfum náð í 8 stig af 33 mögulegum, - 24%. Til samanburðar fengum við 69% stiga eftir að Glenn tók við á síðustu leiktíð. Og það var auðvitað þess vegna sem hann fékk framkvæmdastjórajobbið. Mér hefur alltaf litist vel á Glenn, en margir telja hann ekki nægjanlega öflugan til að stýra stóru liði eins og Newcastle. Þeir vilja merkjavöru.

Og það er það sem ég hef áhyggjur af núna. Að Glenn verði látinn fjúka án þess að áætlun liggi fyrir um framhaldið. Þá gætum við setið uppi með t.d. Sven Göran, af því að hann er merkjavara og nóg er til af honum. En merkjavara er ekki endilaga vandaðri og endingabetri en önnur vara. Hún er bara í tísku á einhverjum tilteknum tíma og eftirsótt þess vegna. Þannig er með Sven Göran, nema hvað ég vona að hann sé alls ekki í tísku lengur. Hann er einhver leiðinlegast þjálfari sem fyrirfinnst að mínu mati og það sem hann gerði með enska landsliðinu sannar það.

Shephard, framkvæmdastjóri Newcastle, er skrítinn náungi. Hann er búinn að prufa að vera í tískunni og hann er búinn að prufa að vera klassískur við ráðningu þjálfara. Af 3 síðustu þjálfurum hafa Sir Bobby og Glenn tilheyrt kalssíkinni. Þeir hafa hinsvegar ekki unnið traust hans og tiltrúnað að fullu. Hann hefur sparað við þá, selt menn og keypt að eigin geðþótta án samráðs, fest leiktíma á payperview leikjum án samráðs o.s.frv. Þannig var það t.d. með leikinn í gær. Shepard tók ákvörðun um að leika leikinn í gær en átti þess kost að leika hann í dag. Að vísu hefði hann misst af greiðslu fyrir sjónvarpsrétt. En er ekki dálítið bratt að vera staddur í Palermo að leika fótboltaleik (flautaður af kl 22) á fimmtudagskvöldi og eiga eftir að koma sér heim og leika annan leik kl 17 á laugardegi.

Hinsvegar virðist Souness hafa fengið allt sem hann vildi. Hann keypti nokkra 10 milljónpundamenn, a.m.k. tveir þeirra ónýtir og einn 17 milljónkrónamann, sem því miður hefur verið meiddur síðan. Þessir menn eru á svo háum launum að Glenn fær ekki að ráða nýja menn nema losa sig við hina áður. Og það er hægara sagt en gert. Ég vil gefa honum lengri sjéns þannig að hann nái að vinna úr gömlum vanda og sýna hvað HANN getur, þegar því er lokið.

Og ekki er ein báran stök. Þetta gæti verið Newcastle.