Dofrablogg

Hvernig drepur maður börn?

 AKTU VARLEGA ÞETTA ER HÆTTULEGASTI
 TÍMI DAGSINS FYRIR ÞIG.

Þetta stendur á skiltinu sem etv er staðsett við stimpilklukkuna í herstöðinni í Nevada eða annarsstaðar þar sem hermaðurinn sem stjórnaði mannlausu árásarflugvélinni sem stuttu áður en hann stimplaði sig út drap 25 saklausa borgara (karlar, konur og börn) í Afghanistan. Maðurinn vinnur sem sagt 9-5 vinnu við að drepa fólk en dvelur sjálfur í faðmi fjölskyldunnar með eiginkonu og elskulegum börnum og hættulegasti tími dagsins er þegar hann ekur heim úr vinnunni.

Sagt er að Ameríkanar viti nánast ekkert um landafræði og að þeir séu almennt lítt meðvitaðir um önnur lönd en BNA nema þeir hafi gert þar innrás. Auðvitað vita þeir lítið sem ekki neitt eftir það heldur en þekkja trúlega amerísku útgáfuna að nafni landsins (Ærak). Þeir vissu aldrei neitt um Vietnam, þeir vita ekkert um Iraq og ekkert um Afghanistan. Að þessu leyti er Sarah Palin hinn sanni Ameríkani sem henni er svo tíðrætt um.

Kanar tala alltaf um andstæðingana sem uppreisnarmenn (insurgent) og eitt af því sem þeir vita ekki er hvernig þeir líta út í Iraq og Afghanistan. Þess vegna beinist hernaður þeirra jafnt að öllum. Það gerði það þegar GWB grobbaði sig að "shock and awe" taktikinni sem notuð var við innrásina í Iraq og gagnast helst gegn almennum borgurum, það gerði það þegar hermenn gerðu árásir að næturlagi með tryllta graðhestatónlist í eyrunum og það gerði það þegar menn voru píndir til dauða í Abu Grahib fangelsinu og öðrum álíka.

Hér fyrir neðan er tengill á grein eftir Tom Engelhardt sem lýsir ágætlega hvernig kanarnir líkjast helst guðum sem sjálfir dvelja óhultir á Ólympusfjalli á meðan þeir láta dauða og eimyrju rigna yfir saklaust fólk. Vestræn og óháð læknasamtök telja að um 1.200.000 hafi látist vegna stríðsins í Iraq en opinberir aðilar telja að um 600.000 óbreyttir borgarar hafi verið myrtir í Iraq. Þetta eru 250 til 500 einstaklingar hvern einasta dag í sjö ár. Tvær til fjórar milljónir manna hafa misst heimili sín í Iraq og um tvær hafa flúið land.

Tom Engelhardt er einn af mínum eftirlætis pólitísku greinendum. Það er hægt að skrá sig á póstlista á heimasíðunni hans og ég mæli með því fyrir alla sem hafa áhuga á því sem er að gerast fyrir utan "main stream" blaðamennskuna. Ég mæli líka með því að prenta greinina frekar en að lesa hana á skjánum. Mér finnst hún full löng til að maður njóti hennar á skjánum.

http://www.tomdispatch.com/post/175232/tomgram:_engelhardt,_the_view_from_mount_olympus__/

Trúleysi á páskum

 Flestir Íslendingar eru trúlausir. Þeir bara vita það ekki.

Þessi fullyrðing byggir aðeins á eigin reynslu og svörum annarra sem ég þekki við spurningum sem skipta máli um það hvort þeir séu í raun trúaðir. Almennt held ég að Íslendingar séu ekki trúaðir á meyfæðingu, upprisu, heilagan anda, göngu á vatni og önnur kraftaverk. Þeir trúa heldur ekki á persónulegan, alvitran og alltumlykjandi guð. En af því að við vitum ekki og getum ekki sannað hvernig heimurinn varð til er því haldið að okkur frá fyrstu tíð af öllum sem eru í kringum okkur að einhver kall sem lítur út eins og Helgi Hóseasson hafi skapað heiminn. Þetta væri allt í lagi ef einhver gæti sagt mér hver skapaði kallinn. Þeir sem ekki trúa þessu með kallinn mega þó eiga það að þeir halda áfram að leita og spyrja um upphaf heimsins en hinir bara sætta sig við Status Quo. Þó ekki allir. Prestur sem var samkennari minn á Hagskóla (Frank Halldórsson) útskýrði þetta allt þannig að fyrst þyrfti maður að trúa á guð og þá gæti maður trúað öllu hinu. Þetta er einmitt málið

En hvers vegna í ósköpunum er ég að pæla í þessu nú á föstudaginn langa? Jú, ég var í fermingarveislu í gær og þar las fermingarbarnið upphátt það sem stóð á kortunum og lét kortin ganga. Og bullið var yfirgengilegt, - fyrir minn smekk. Sjáið t.d. þetta:

Ungum er það allra best
að óttast Guð sinn herra.
þeim mun viskan veitast mest
og virðing aldrei þverra.

Hversvegna eiga allir að óttast þennan almáttuga og algóða herra? Þetta er endurtekið aftur og aftur í biblíunni og í útskýringum fyrir trúaða, t.d. hérna: Drottin Guð þinn skalt þú óttast og honum skalt þú þjóna…. og líka hérna: Drottinn hefir þóknun á þeim, er óttast hann, þeim er bíða miskunnar hans.... (Sl 106.1; 136.25; 146.9-11). Og þetta bull um gaukinn sem er að þvo einhverjum 12 gaurum um fæturna eða grúppían sem þvær gauknum um fæturna og þurrkar með hárinu!!!

Og þetta er allt saman óháð því sem hefur verið að koma í ljós með hina karlremdu og kvenmannslausu kaþólsku kirkju.

Ég vissi ekki að ég var trúlaus fyrr en ég las bókina The God Delusion eftir Richard Dawkins. Þar fer hann lið fyrir lið yfir þau atriði sem ég hélt að væru undirstaða trúar minnar. Eftir lestur bókarinnar fattaði ég að ég var ekki trúaður og hafði aldrei verið trúaður. Mér hafði hinsvegar verið sagt að ég væri trúaður og var svo vel uppalinn og stilltur strákur að ég bara var trúaður. Nú þykir mér flest þetta trúarbull vera hlægilegt og stundum hræðilega asnalegt. Það á t.d. við um óttann sem kirkjan notar til að hafa áhrif. Ótti er skilvirkasta vopn sem til er til að berja menn til hlýðni. Notað í stjórnmálum í stórum stíl.

Gleðilega páska.