Dofrablogg

Fallnir í aðra deild

Ég verð víst að viðurkenna að fótbolti er miklu skemmtilegri ef von er til þess að liðið manns nái góðum árangri. Það er þá að einhverju að keppa. Þannig hefur þetta ekki verið með liðið mitt undanfarin ár. Síðasti pistillinn minn um Newcastle United var skrifaður í jan 2008 og síðan þá höfum við haft 5 þjálfara ef ég tel Big Sam með.

Newcastle United er fallið í aðra deild og átti það fyllilega skilið. Undanfarnir 3 leikir gátu allir valdið úrslitum um það hvort við féllum en við megnuðum ekki að nýta okkur það. Til marks um dugleysi okkar og til að kóróna lánleysið þá féllum við á markinu sem við skoruðum í eigið mark í síðasta leik tímabilsins.

Núverandi eigandi Newcastle United er Mike Ashley, nýríkur bísnismaður sem sver sig í ætt við Jón Ásgeir o.fl. útrásarvíkinga. Hann varð ríkur á því að kaupa vörumerki og reka sportvöruverslanir, er á svipuðum aldri og græðgisgæarnir okkar og á svipuðum slóðum á listum yfir ríka menn í Englandi. Og eins og suma þeirra dreymdi hann um að eignast fótboltalið. Það var svo hip.

 Hann keypti liðið fyrir tveimur árum og síðan hafa 6 stjórar komið við sögu, fótboltaforstjóri og tugir ráðgjafa um stjórnun og fótbolta sem töldu sig nú aldeilis vita allt um rekstur á fótboltaliði. Mestum hluta þjálfara, nuddara, sjúkraþjálfa, sálfræðinga, búningaþvottakonum og drykkjarvörudrengja hefur líka verið skipt út a.m.k. einu sinni. Og árangurinn er þessi.

Er þetta nokkuð kunnuglegt mynstur? Höfum við nokkuð horft uppá einhverja snillinga fljúga hátt og setja svo allt á hausinn?

Wii Fit líkamsræktartækið

Ég hef alltaf talið mig vera frekar raunsæjan og skynsamann mann. Uppá síðkastið hef ég líka fengið talsvert út úr því að láta bera á því að ég hafi lært eitthvað með árunum. Að ég hafi reynslu og taki mark á henni. Þetta á t.d. við um mataræði og líkamsrækt. Ég veit allt sem ég þarf að vita um prótein, kolvetni, um mettaða og ómettaða fitu og um transfitu, um HDL og LDL, BMI, og PSA, um kalóríur, BMR ofl. ofl. Ég veit líka sitthvað um eróbik, styrktaræfingar, teyjuæfingar og bicep og tricep.

Vandamálið hefur alltaf verið að nota þessa vitneskju á árangursríkan hátt til að halda bæði þyngd og líkamlegu atgjörvi í góðu horfi. Nú hefur þetta breyst á einni svipstundu. Ég rakst á frábært undratæki á netinu sem á eftir að gera mig bæði grannan og stæltan. Og ég er kominn lengra því ég er nú þegar búinn að ákveða hvar ég ætla að staðsetja tækið í íbúðinni hjá mér og hef tryggt mér einkaumboð til að selja tækið í allri Austur Evrópu.

Sumir eru alltaf að setja sér óraunhæf markmið og renna svo á rassinn með allt. Þetta er ekki þannig og ég get varla beðið með að byrja að gera æfingar. Og fyrsta æfingin, þessi með að halla sér á hliðarnar til skiptis, sýnist mér vera alveg mögnuð. Horfið á myndbandið og leggið inn pöntun. Ekki gleyma því að það mun fljótt reynast nauðsynlegt að hafa fleiri en eitt tæki á heimilinu ef heimilismenn eru fleiri en einn. Þetta er einmitt alveg stórfínt fjölskyldusport.

Nú er gaman í Newcastle

Big Sam, fyrrv. þjálfarinn hans Guðna Bergs, er hættur og leit stendur sem hæst að nýjum þjálfara. Að mörgu leyti tók Sam upp ný vinnubrögð hjá Newcastle. Það sem hann hefur ekki náð að sanna hjá Newcastle, er að hann kunni að spila fótbolta. Innkaupin hans, liðsuppstillingar og leiktaktik benda eindregið til þess að hann kunni það ekki. Ég hef tekið þátt í umræðunni á netinu, t.d. með eftirfarandi:

16. des. 2007
After Sam produced some ProZone statistics I went through the trouble of counting the long balls (í leik á móti Fulham). 19 in the first half and 18 in the second, total 37. After 7 of those we kept possession although we lost possession rather quickly in some cases. After 30 long passes we did not get possession of the ball...

4. jan. 2008
As coincidences go this one is telling: On this day in 2006 under Souness we had 26 points. On this day in 2007 under Roeder we had 26 points. Both managers were sacked, Souness in feb 2006, Roeder in may 2007. ...

Þetta er ekki ný staða fyrir Newcastle því við höfum haft 6 þjálfara á 10 árum. En samt er allt öðruvísi núna vegna þess að nýir menn eru við stjórnvölinn hjá Newcastle United. Nýr eigandi, ný stjórn, nýr framkvæmdastjóri og félagið er ekki lengur skrásett í kauphöllinni. Sem sagt, eigandinn þarf ekki að taka nótís af neinum nema sér sjálfum og stuðningsmönnum.

Nú verður verulega spennandi að sjá hver kemur til félagsins og hvernig hann tekur á málum. Maður verður að reikna með 2-3 árum þangað til við náum árangri, t.d. með því að komast í Evrópukeppni og keppa við hina 4 stóru. En við gerum kröfu um að sjá breytinar strax frá því sem Sam var að gera.

Allir mæna nú til Alans Shearers um að hann taki við þjálfarastarfinu. SPENNANDI.

Orð dagsins:

Ég er bjartsýnismaður. En ég er bjartsýnismaður sem tekur regnfrakkann sinn með. 

(Harold Wilson)

Big Sam á leiðinni

  Á meðan við Kári ræddum okkar á milli um það á sunnudaginn var að nú væru dagar Glenns Roeder hjá Newcastle taldir, þá sat Roeder sjálfur við að skrifa uppsagnarbréfið. Saga Newcastle í þjálfaramálum er broguð, - svo ekki sé meira sagt. Eftir Kevin Keegan hafa þeir allir verið lausráðnir. Sir Bobby var auðvitað langflottastur, en Souness lang sístur. Það var þó Souness sem naut mests trausts hjá Shepherd og stjórn félagsins. Hann fékk aldrei almennilegan stuðning stuðningsmannanna, en Shepherd afhenti honum 50 millj, punda. Sir Bobby fékk ekkert álíka og enn síður Glenn kallinn.

Eitt er þó til bóta hjá Shepherd núna. Í stað þess að reka þjálfara á miðju tímabili, án þess að hafa hugmynd um hver gæti tekið við, þá er nú sumarið framundan og nýr þjálfari í sigtinu. Við skulum a.m.k. vona að atburðarásin í kringum Big Sam Allardyce sé hönnuð með það að markmiði, að hann taki við. Að vísu sagðist hann ætla að setjast í helgan stein eftir að samningstímabilinu lyki, þegar hann undirritaði 10 ára samning við Bolton árið 1999. En allt bendir þó til þess að hann taki við. Hann mun þá ekki fá neitt viðlíka summu til innkaupa og Souness fékk.

Engin efast um hæfni Big Sam. Og Guðni Bergs bar honum afbragðsgott orð. Hann er algjör tækni gúrú og notar sálfræðinga, óhefðbundnar lækningar og austurlandavísindi til að mótívera leikmenn og búa þá sem allra best fyrir hvern leik. Maður hefur haft á tilfinningunni að það sé eitthvað að þjálfunaraðferðum í Newcastle, sem veldur ofurtíðni meiðsla. Souness kenndi æfingarvellinum um og Glenn kom með nýtt staff að hluta, en eftir sem áður héldu meiðslin áfram sem aldrei fyrr. Ef Big Sam kemur til verka, munu allar aðferðir breytast og vonandi þýðir það endalok ofurmeiðsla.

Að sjálfsögðu fara í gang sögur um alla þá þjálfara sem hafa áhuga á jobbinu. Ég vona bara að sögurnar af Sven Göran eigi ekki við rök að styðjast. Og þótt Toonherinn hafi blendnar tilfinningar í garð Big Sam, þá hlakka ég til að fá hann. Mig er farið að dauðlanga í stabílitet.

 

Orð dagsins:

"If you're not a born-again Christian, you're a failure as a human being."

(Jerry Falwell)

Newcastle-Portsm.

Slæmu fréttirnar: 

Zog, Parker og Milner eru komnir á sjúkraskránna með öllum hinum og Dyer fékk svöðusár á lærið. Zog, Duff, Milner og Emre hanga of mikið á boltanum og afspilinu oft ábótavant. Emre tekur skotið í stað þess að gefa á dauðafrían og eldheitan Obafemi. Oba hittir ekki nægjanlega vel markið, sem er ókostur fyrir sóknarmann. Hmmm!

Og svo góðu fréttirnar:   

1. Dyer gefur liðinu alveg nýja vídd. Hann er sá eini sem hefur auga fyrir og virkjar "auða rýmið." Hann hangir á boltanum, en öfugt við hina, þá skapar hann með því autt rými og notar það.
2. Hin alræmda vörn er að gera það gott. Oft er skelfilegt að horfa á, en þeir hafa snarbatnað og engin stórkostleg glappaskot. Enda komnir með þjálfara með víkingablóð, ef mark má taka á nafninu (Nigel Pearson = Nikulás Pétursson).
3. Solano tekur möglulaust að sér hægri bak og skilar því með sóma.
4. Og Sibierski. Ókeypis öldungurinn, sem ekki var nothæfur hjá Mancity. Honum fer fram með hverjum leik. Ég held bara að hann sé fljótari að hlaupa núna en í haust. Í okkar meiðslamálum hefur hann verið ómissandi og óborganlegur. Satt að segja leist mér nú ekkert sérlega vel á hann, hélt hans hlutverk væri bara að fylla uppí tölu leikmann á vellinum. En aldeilis ekki.

Góðir tímar framundan. Ég á eftir að sjá nýja 007, ég fer á tónleika á sunnudagskvöldið kl 24:00, Mozart Requiem og ég fer til Rómar 7. des. n.k. Fjögurra nátta ferð. Hey jibbí jei.

 

Myndavélin lofar góðu. Zoomið er
frábært. Báðar myndirnar eru teknar fríhendis.

 

Við erum neðstir

..... ásamt með tveim öðrum liðum. Við höfum náð í 8 stig af 33 mögulegum, - 24%. Til samanburðar fengum við 69% stiga eftir að Glenn tók við á síðustu leiktíð. Og það var auðvitað þess vegna sem hann fékk framkvæmdastjórajobbið. Mér hefur alltaf litist vel á Glenn, en margir telja hann ekki nægjanlega öflugan til að stýra stóru liði eins og Newcastle. Þeir vilja merkjavöru.

Og það er það sem ég hef áhyggjur af núna. Að Glenn verði látinn fjúka án þess að áætlun liggi fyrir um framhaldið. Þá gætum við setið uppi með t.d. Sven Göran, af því að hann er merkjavara og nóg er til af honum. En merkjavara er ekki endilaga vandaðri og endingabetri en önnur vara. Hún er bara í tísku á einhverjum tilteknum tíma og eftirsótt þess vegna. Þannig er með Sven Göran, nema hvað ég vona að hann sé alls ekki í tísku lengur. Hann er einhver leiðinlegast þjálfari sem fyrirfinnst að mínu mati og það sem hann gerði með enska landsliðinu sannar það.

Shephard, framkvæmdastjóri Newcastle, er skrítinn náungi. Hann er búinn að prufa að vera í tískunni og hann er búinn að prufa að vera klassískur við ráðningu þjálfara. Af 3 síðustu þjálfurum hafa Sir Bobby og Glenn tilheyrt kalssíkinni. Þeir hafa hinsvegar ekki unnið traust hans og tiltrúnað að fullu. Hann hefur sparað við þá, selt menn og keypt að eigin geðþótta án samráðs, fest leiktíma á payperview leikjum án samráðs o.s.frv. Þannig var það t.d. með leikinn í gær. Shepard tók ákvörðun um að leika leikinn í gær en átti þess kost að leika hann í dag. Að vísu hefði hann misst af greiðslu fyrir sjónvarpsrétt. En er ekki dálítið bratt að vera staddur í Palermo að leika fótboltaleik (flautaður af kl 22) á fimmtudagskvöldi og eiga eftir að koma sér heim og leika annan leik kl 17 á laugardegi.

Hinsvegar virðist Souness hafa fengið allt sem hann vildi. Hann keypti nokkra 10 milljónpundamenn, a.m.k. tveir þeirra ónýtir og einn 17 milljónkrónamann, sem því miður hefur verið meiddur síðan. Þessir menn eru á svo háum launum að Glenn fær ekki að ráða nýja menn nema losa sig við hina áður. Og það er hægara sagt en gert. Ég vil gefa honum lengri sjéns þannig að hann nái að vinna úr gömlum vanda og sýna hvað HANN getur, þegar því er lokið.

Og ekki er ein báran stök. Þetta gæti verið Newcastle.    

WM 2006/4

Rosalega voru Germannarnir góðir á móti Svíum. Fljótandi og fínn bolti hjá þeim.  En, - þeir geta ekki orðið heimsmeistarar. Germannar eru þekktir fyrir skipulag, snyrtimennskum og nákvæmni. Það kemur því ekki til greina að þýskt lið sem hefur 5 leikmenn með skyrturnar uppúr buxun um verði meistarar. Tjallin getur gert svoleiðis, en ekki þýskir.

Og Tjallinn er bara með 1 sem ekki nennir að setja buxurnar ofaní. En - þeir eru með 2 sem leika í síðerma treyjum. Síðermatreyjum í 30° hita. Þvílíkir sissííís. Þetta er engir smákallar. Sjálfur Beckham og Rooney. Rooney hafði þó vit á að skipta í hálfleik. En lið sem leikur í síðerma skyrtum verðu ekki heimsmeistari.

Það var verst að rússakallinn skyldi reka Deco o.fl snilldar Portúgala út af. Þeir hafa nefnilega Scolari mentalitetið. Og það dugir langt. En undir þessum kringumstæðum gætu þeir tapað fyrir Tjöllunum.

En mínir menn frá Argentínu stóðu fyrir sínu. Leynivopn Mexikana kom þeim að vísu í opna skjöldu en ... Hvaða leynivopn? Jú Mexikanar mættu með fleiri síðhærða en mínir menn. Argenínar bera ógurlega virðingu fyrir síðhærðum karlmönnum. Ég held bara meiri virðingu en fyrir tangotíkum sbr. Maradonna, Batistuda, Crespo o.s.frv.

Og svo held ég líka með Áströlum. Þeir eru underdogs, en með Hidink mentalited, sem er jafngott og hið Scolariska. Auk þess leikur okkar ágæti Craig Moore frá Newcastle United í miðri vörninni með miklum bravur.

Áfram Argentína!!! 

WM 2006/3

Daginn sem ég bloggaði um að Argentína væri mitt lið þá unnu þeir Serbíu 6-0.

Ég er sko með þetta allt á hreinu.

Annars var ég að horfa á 1-1 leik Ítalíu og USA. Ég var búinn að sjá einn leik með Ítalíu áður og þeir eru gjörsamlega slappir. Leikurinn á móti USA var nánast fáráðlegur. Ítalía missti mann útaf eftir hálfíma og USA missti mann stuttu síðar. Í byrjun síðar hálfleiks missti USA svo annan mann útaf. Og Ítalía gat ekki unnið með 9 útileikmenn á móti 8. Staðir, hugmyndasnauðir, slappar sendingar og þreyta. Ég held þeir séu  með sömu veiki og Englendingar, gömlu mennirnir. Bara á hærra stigi.

Þjóðverjarnir voru líka hugmyndasnauðir, pirraðir og með stjörnustæla sem þeir áttu ekki inni fyrior á móti Póllandi. Leitt að þurfa að segja það.

Engin leið til að þeir verði heimsmeistarar þetta árið.

Áfram Argentína.

WM 2006/2

Fyrstu umferð lokið og önnur komin á leið.

England 2- 0 Trinitad Tobago.

Leikurinn sannaði allt sem ég hef sagt um enska liðið. Ég hef nefnilega haldið því fram að það vantaði neistann, áhugann, sköpunargleðina og hraðann í liðið. Þeir líta út eins og gamlir kallar sem eru löngu orðnir leiðir á vinnunni sinni. Þeir hafa allir leikið svona um 50 leiki í vetur og eru dauðþreyttir. "Sameold, sameold, við verðum víst að drífa í þessu" hugarfarið. Ekkert gaman, engin stemming. Ég held að menn með þessar tekjur hafi ekki gaman að neinu. Þeir eru í vandræðum með að finna eitthvað nóg og fínt og dýrt til að toppa hvern annan. Þegar menn eru farnir að nota Hummer fyrir eldhúsbíl er fátt eftir.

Ég hef líka sagt að einmitt vegna þessa verði Englendingar að spila á ungu mönnunum sínum. Þeir eru enn gráðugir, hafa enn gaman af fótbolta og eru til í að leggja ýmislegt á sig. Þegar Sveinn hafði skipt inná þremur mönnum um tvítugt, þá fóru hlutirnir að gerast. Hraðinn jókst, snerpan jókst og það losnsði um allt liðið. Meira að segja gömlu mennirnir litu miklu betur út. Og í framhaldinu fóru þeir að skora.

Af þeim liðum sem ég hef séð er Argentína best. Ég spái þeim sigri.

Nú héðan er allt gott að frétta. Hitinn hefur náð yfir 10° nokkra daga í röð og nú nálgast lengsti sólarhringur ársins. Það er auðvitað löngu orðið bjart á nóttunni og stundum er ekki einu sinni frost á nóttunni.

Það er nú það.

Þýskal.- Costa Rica

Jæja. Ekki sá ég heimsmeistarana í dag. Pitty, því ég var hálfpartin að halda að Þjóðverjarnir myndu vinna á heimavelli. Það vantaði mikið uppá hjá báðum liðum. Þýska vörnin léleg og í sóknina vantaði heimsmeistarasnerpu. Á miðjuna vantaði auðvitað Ballack, - það reyndar bráðvantaði hann. Það kom mér á óvart hvað bæði lið voru léleg á boltanum. Það vantaði líka hraða og bara ... Lélegur leikur.

Costa Rica varðist með fjölda en ekki með fágun og mörkin þeirra tvö sýna betur en margt annað hversu léleg þýska vörnin var. Líka Lehmann, sem leit illa út í báðum mörkunum. Kæmi mér ekki á óvart að Kahn tæki næsta eða þarnæsta leik ef Lehmann sýnir ekki meira.

Hinsvegar eru þjóðverjar þekktir fyrir að ná langt, jafnvel þótt þeir leiki illa að mati áhorfenda. Og þegar Ballack kemur. Hver veit ???